Imindeni noma izibongo zinezinto ezikholelwa kuzo noma eziyimikhuba eyenziwayo engenziwa kweminye imizi njengokuthi uma kukhona ilunga lomndeni eseligule isikhathi eside lingabingcono, balicelele emadlozini omndeni ukuthi aliphumuze ezinhlungwini asezizwile. Lomkhuba ubizwa ngokuthi ukwenzelwa umphako. Ngesinye isikhathi lowo ogulayo uyazicelela kwabomndeni lomphako nabo babonisane ukuthi kungenzeka usebanjwe yiwona.
Njengokuhlukana kwemindeni eminye ihlaba imbuzi kuthi eminye ihlabe inkukhu. Kushiswe impepho kukhulunywe nabadala kucelelwe lowomuntu ogulayo. Umuntu owayenzelwa umphako umuntu osegugile isikhathi eside engasindi. Ziningi izinto abantu abadala abakholelwa kuzo uma bebona ukuthi isihlobo sabo asisahambi emhlabeni noma sesigule kakhulu njengokuthi kukhona izinto ezimbambile noma usaba ukufa nje. Abanye abantu babebanjwa yizinto abazithandayo umndeni uze ukhulume nabo ukuthi bazoziphatha kahle lezozinto okungaba yizingane noma yimfuyo. Kanti kukhona ababanjwa yizenzo zobubi ababezenza abanye bacele kubizwe bonke abantu ababenza okubi ukuthi bazohlambuluka kubona. Ngemuva kokuhlatshwa kwesilwane esenziwa umphako wakhe lowo ogulayo uyanikezwa inyama noma isobho ukuthi adle atshelwe ukuthi umphako wakhe. Akube kusaphela isikhathi eside ngemuva kwalokhu umuntu ube esehamba emhlabeni.
Kuningi umndeni okufundayo ngalesikhathi umuntu wawo ugula ngoba kuvela izimpawu zalokho obukwenza usaphila. Abantu abaningi bayazifihla izinto zabo kodwa uma eseficwa ukufa zivele obala. Yilapho umndeni uthatha isinqumo sokuthi lowo obengahambi kahle noma ekhohlakele ngeke abeyingxenye yamadlozi omndeni kodwa uma kade ungumuntu obethembekile bakholelwa ukuthi uzoqhubeka ube yidlozi elihle emndenini. Ziningi futhi izimpawu umndeni obubona ngazo uma umuntu lowo esezodlula emhlabeni njengokuthi uma kukhona abantu abazombona ogulayo amane ashalaze angafuni ukuthi amehlo akhe ahlangane nawalabobantu kusho ukuthi usezoshona, noma uma ecela amanzi okuphuza usuke esezoshona noma acele inyama usuke esezicelela umphako.
Ngalesikhathi kukhona umuntu ogulayo ekhaya ziningi izinto ezingenziwa njengokwakhiwa kwendlu noma ukushayelela uphahla noma kunendlu ekhaya abebefuna ukuyidiliza akube kusenziwa lokho ngoba kuthiwa nimbangela ukufa ogulayo. Kweminye imizi ngisho imicimbi yenjabulo ayenziwa ngalesikhathi kukhona ogulayo. Kunenkolelo yokuthi uma imoto iphaphalaze yashayisa umuzi onomuntu ogulayo ugcina ngokushona lowomuntu noma ngabe akekho ogulayo lokho kubika isifo.
Kunezinkolelo ezithinta umuntu othakathayo njengokuthi uma eshonile kubanemvula enkulu esithubeni likade libalele ngosuku lomngcwabo. Kanti uma kushone umuntu olimale engengozi yemoto, ngesikhali, ngomlilo noma ngokumuka noma ukuminza kufanele umndeni uwuvale lowomkhokha omubi ngoba kunenkolelo yokuthi kuzoqhubekela kwabanye bomndeni.
English Summary
In a family when there is a terminally ill person, the family can do a ceremony to ask the ancestors to put that person to rest. A goat or a chicken is slaughtered and the sick person eats a piece of meat or drink its soup. There are cases where the request comes from the sick person and the family can then slaughter, but it depends on the personality of that individual. If the patient is perceived as rude and corrupt the family must keep it a secret what the slaughtering is about, otherwise the patient will not co-operate and eat the meat or drink the soup. This depended on each family belief.
There are things that the family is prohibited to do when there is a terminally sick person, for example building a house. There are many reasons that can cause someone not to die when they are supposed to be dead, for instance the love of their livestock. The sick person will be worried about who is going to look after the livestock when he is gone and the family should tell him that they will look after everything very well. And if it is a corrupt person he/she might request that the family calls a family meeting and they will ask for forgiveness from people that they have hurt. It is believed that after eating the meat the sick person will die shortly after that ceremony.
By: Nelisiwe Hlongwane